మరిపెడ(చిన్నగూడూరు), వెలుగు: చెత్తకు పెట్టిన నిప్పు ప్రమాదవశాత్తు పక్కనున్న తోటకు అంటుకోవడంతో భారీగా జామాయిల్ దగ్ధమైంది. మరిపెడ మండలంలోని మేగ్య తండాకు చెందిన భూక్యా శంకర్ తన మొక్కజొన్న చేనులోని చెత్తకు నిప్పంటించి తగులబెట్టాడు. ఎండ తీవ్రతకు తోడు గాలి వేగంగా వీచడంతో మంటలు ఒక్కసారిగా పక్కనే ఉన్న భూక్యా బాషునాయక్ జామాయిల్ తోటకు వ్యాపించాయి. నిమిషాల వ్యవధిలోనే మంటలు ఎగిసిపడి తోట మొత్తం కాలిపోయింది. ఈ ప్రమాదంలో సుమారు రూ.20 లక్షల మేర నష్టం వాటిల్లినట్లు బాషు నాయక్ వాపోయాడు. కళ్లముందే చేతికొచ్చిన పంట అగ్నికి ఆహుతవడంతో రైతు గుండెలు బాదుకున్నాడు. అధికారులు స్పందించి నష్టపరిహారం అందించాలని కోరాడు.
8 ఎకరాల మొక్కజొన్న పంట దగ్ధం
కారేపల్లి, వెలుగు: ఖమ్మం జిల్లా కారేపల్లి మండలం గుంపెల్లగూడెం గ్రామ సమీపంలో ఆదివారం అగ్నిప్రమాదం వల్ల 8 ఎకరాల్లో మొక్కజొన్న పంట పూర్తిగా కాలిపోయింది. గుంపెల్లగూడెం గ్రామానికి చెందిన పాపారావు, వీరు, ఉపేందర్ మొక్కజొన్న సాగు చేశారు. పంట ఎండిపోయి కంకులను కోసి యంత్రంలో వేయడానికి సిద్ధంగా ఉంచారు. ఈ సమయంలో అగ్నిప్రమాదం జరగడంతో పంట దగ్ధమైంది. అగ్నిమాపక సిబ్బంది రైతులతో కలిసి మంటలను అదుపులోకి తెచ్చారు. ఇతర పొలాలకు మంటలు వ్యాపించకుండా నియంత్రించారు. ఈ ఘటనలో సుమారు రూ.8 లక్షలు నష్టం వాటిల్లినట్లు బాధితులు తెలిపారు. మండల వ్యవసాయ అధికారి అశోక్కుమార్ ఘటనాస్థలాన్ని పరిశీలించారు. ప్రమాదానికి గల కారణాలపై పోలీసులు దర్యాప్తు చేస్తున్నారు.
